საქართველოში გაყიდულ ბავშვის რძის პროდუქტში შესაძლოა სალმონელა იყოს

საქართველოში გაყიდულ ბავშვის რძის პროდუქტში შესაძლოა სალმონელა იყოს

საქართველო იმ ქვეყნების რიცხვშია, სადაც სალმონელას ბაქტერიით ინფიცირებული ფრანგული რძის პროდუქტების ექსპორტირება ხდებოდა. საფრანგეთმა ჩვილი ბავშვებისთვის განკუთვნილი პროდუქციის ვაჭრობიდან ამოღება მთელი მსოფლიოს მასშტაბით გამოაცხადა. საუბარია კომპანია "ლაქტაილის" მიერ წარმოებულ რძეზე და რძის პროდუქტებზე. განკარგულება საფრანგეთის ეკონომიკის მინისტრმა გასცა, რის მიხედვითაც, ვაჭრობიდან სასწრაფოდ ამოიღებენ იმ პროდუქციას, რომელიც 2017 წლის თებერვლის შემდეგ არის ნაწარმოები. კომპანია ექსპორტს აფრიკის, აზიის, ევროპისა და სამხრეთ ამერიკის ქვეყნებში ახორციელებს.

სურსათის ეროვნული სააგენტოს განცხადება

სურსათის ეროვნული სააგენტოს განცხადება

ბავშვთა საკვებში სალმონელას ჩხირების შესაძლო არსებობასთან დაკავშირებით, ინფორმაციას სურსათის ეროვნული სააგენტო სპეციალური განცხადებით ეხმაურება. განცხადების მიხედვით, სააგენტო მოკვლევას უკვე ატარებს. ასევე, მიმდინარეობს კანონმდებლობით გათვალისწინებული ღონისძიებები და სურსათის ბაზრიდან გამოთხოვის პროცესი. ფრანგულმა უმსხვილესმა კომპანია „ლაქტაილმა“ საექსპორტოდ განკუთვნილი პროდუქცია ქსელიდან მას შემდეგ ამოიღო, რაც საფრანგეთში, ჩვილებში სალმონელას ბაქტერიის გავრცელების 26 შემთხვევა დაფიქსირდა.

ბათუმში დაზიანებული ინფრასტრუქტურის აღსადგენად 128 000 ლარი გამოიყოფა

ბათუმში დაზიანებული ინფრასტრუქტურის აღსადგენად 128 000 ლარი გამოიყოფა

ბათუმში, ახველედიანის ქუჩაზე მომხდარი აფეთქების შედეგად დაზიანებული შენობების აღსადგენად 128 ათასი ლარი გამოიყოფა. თუმცა, ექსპერტების თქმით, ზარალის ოდენობა ბოლომდე დაზუსტებული არ არის და შესაძლოა თანხა კიდევ გაიზარდოს. აჭარის პოლიციის სამმართველოს უფროსის მოადგილის გიორგი მესხის განცხადებით, ბათუმში მდებარე კორპუსში აფეთქება ბუნებრივმა აირმა გამოიწვია. შეგახსენებთ, რომ ბათუმში, ახვლედიანის ქუჩაზე აფეთქების შედეგად, 6 ადამიანი, მათ შორის, 2 ბავშვი დაშავდა; 10-მდე ოჯახი კი საცხოვრებელი ფართის გარეშე დაჩა. აჭარის მთავრობის ინფორმაციით, მერიამ დაზარალებულებს დროებითი საცხოვრებელი ფართები უკვე შესთავაზა.

ჯანდაცვის კომიტეტის სამოქმედო გეგმის პრეზენტაცია

ჯანდაცვის კომიტეტის სამოქმედო გეგმის პრეზენტაცია

უფასო მედიკამენტების ნუსხა შესაძლოა გაფართოვდეს. ამის შესახებ, ჯანდაცვის კომიტეტის თავმჯდომარემ, აკაკი ზოიძემ 2017-2030 წლების სამოქმედო გეგმის პრეზენტაციისას განაცხადა. მისი თქმით, მნიშვნელოვ ანია, რომ წამლების ასორტიმენტი და კონტინგენტი გაიზარდოს და ყველა ქრონიკულ ავადმყოფზე გავრცელდეს, განსაკუთრებით კი, საპენსიო ასაკის ადამიანებზე. ამჟამად, უფასო, ამბულატორიული მედიკამენტების ჩამონათვალში, 30-მდე მედიკამენტია, რომელიც 4 ყველაზე უფრო გავრცელებული ქრონიკული დაავადებების სამკურნალოდ გამოიყენება და სოციალურად დაუცველი მოქალაქეებისთვის არის განკუთვნილი.

საქართველოს სამთო-სათხილამურო კურორტები დამსვენებლების მისაღებად მზად არის

საქართველოს სამთო-სათხილამურო კურორტები დამსვენებლების მისაღებად მზად არის

ბაკურიანში, დიდველის სათხილამურო გზა ოფიციალურად გახსნა. ტურისტებისთვის უკვე მზად არის 14 კმ-ნი 7 სათხილამურო გზა, მაღალტექნოლოგიური ღამის განათებებით, რომელიც გათვლილია ყველა ტიპის მოთხილამურისთვის. ტურისტული სეზონი უკვე გაიხსნა გუდაურისა და გოდერძის სათხილამურო გზებზეც. გუდაურში14 საბაგიროა და ხელოვნური გათოვლიანების სისტემა მოქმედებს. „გოდერძი რესორტ“-ს 4 ახალი საინვესტიციო პროექტი შეემატა, რის ფარგლებშიც, კურორტზე, ჯამში 10 სასტუმრო და დასასვენებელი კოტეჯი აშენდება; მშენებლობის დასრულების შემდეგ კი, 75 ადგილობრივი დასაქმდება. კურორტ ,,გოდერძის“ სათხილამურო გზის სიგრძე 8 კილომეტრია, ყველაზე მაღალი სადგური კი - ზღვის დონიდან 2366 მეტრ სიმაღლეზე მდებარეობს. ზამთრის ტურისტული ზონები მომდევნო დღეებში, სხვა რეგიონებშიც ეტაპობრივად, ოფიციალურად გაიხსნება.